• Shpërndaje

28-vjeçari u arrestua në Tiranë ku po merrte mjekim

Elbasani u rikthehet ngjarjeve kriminale, teksa një përplasje me armë zjarri ka ndodhur në lagjen Emin Matraxhiu, në një zonë mjaft të populluar, ku ka mbetur i plagosur një 28-vjeçar.

Elvis Çaushllari, i njohur me nofkën “Vis Korçari” dhe i cilësuar si një person me rrezikshmëri të lartë është konfliktuar me Migert Qosen, 25 vjeç. Dyshohet se Mirgen Qosja, që drejtonte një automjet tip “Ford” nuk i ka hapur rrugë Elvis Çaushllarit, i cili drejtonte një automjet tip “Mazda”. Kjo është bërë shkak që fillimisht të dy këta shtetas, që kishin njohje mes tyre, të përfshihen në një konflikt verbal nga makinat dhe më pas dhe fizik dhe për të përfunduar në përdorimin e armëve kundrejt njeri tjetrit.

Si pasojë shtetasi Elvis Çaushllari është plagosur lehtë dhe për t’i shpëtuar policisë, ka tentuar të mjekohej në spitalin ushtarak në Tiranë, por është arrestuar nga policia. Ndërkohë që policia vijon kontrollet intensive për kapjen e autorit të dytë të kësaj ngjarjeje, shtetasin Migert Qosen.

Materialet hetimore në ngarkim të dy shtetasve i kaluan prokurorisë, për veprime të mëtejshme, për veprat penale “Vrasje me dashje” e mbetur në tentativë dhe “Armëmbajtja pa leje”.

Elvis Çaushllari është një emër mjaft i njohur për policinë në Elbasan, pasi rezulton të jetë i përfshirë në disa ngjarje të tjera kriminale në qytet. Në Shkurt të këtij viti ai u padit nga një qytetar për dhunë pasi e ndaloi me makinë duke tentuar ta nxjerrë prej saj.

Tv Klan