• Shpërndaje

“Duhet hapur rruga për të rinjtë”

Kryeopozitari Lulzim Basha në një aktivitet të organizuar nga FRPD-ja me rastin e Ditës Kombëtare të Rinisë tha se PD në qeveri do të mundësojë një jetë më të mirë për shqiptarët.

Ai u shpreh se do të bëjë çmos që të rinjtë të shpalosin talentet në vendlindje si dhe të bëhen pjesë e vendimmarrjes. Kreu i PD-së mori  zotimin se kur të vijë në pushtet do të ketë objektiv uljen vetëm në dy mandate për një kryeministër.

“Marr një zotim të veçantë që është kufizimi i pushtetit. Një ndër objektivat e mi do të jetë kufizimi në dy mandate i postit të kryeministrit. Jam i bindur se për të kthyer besimin e njerëzve tek politika si një instrument që përmirëson shanset për të gjithë duhet zëvendësuar politika si burim privilegjesh dhe duhet të lehtësohet hapja e rrugës brezit të ri të vendit”, tha Basha.

Ai thumboi kryeministrin Edi Rama kur u shpreh se “Atë që nuk e arrin në 8 vite nuk e arrin as në 50 vite në pushtet”. Synimin e tij kreu i PD-së tha se do ta realizojë përmes parlamentit të ri ose referendumit, por për të është e sigurt që do të bëhet realitet.

“Pse duhet të  kemi pushtetarë të përjetshëm kur kemi kaq shumë potenciale, përfshirë të rinj e të reja që sjellin një përqasje të reja. Dy mandate janë të mjaftueshme për të dhënë një kontribut për vendin. Çdokush duhet t’i hapë rrugë të rinjve që të marrë në dorë fatet dhe frerët e drejtimit të vendit”, tha Basha./tvklan.al